DE LA VIÑETA AL TEATRU

José Manuel Rodíguez

"Y llega'l momentu de falavos d'otra de les facetes de la mio vida: la teatral. Nella, naturalmente, metiéronme les circunstancies, la popularidá qu'algamó n'Asturies la mio pareya de Pinón y Telva. Yera la época cuando'l xenial y yá desapaecíu José Manuel Rodríguez, el inolvidable playu xixoniegu, vino a veme a Uviéu a proponeme que-y escribiere una comedia asturiana basada nos mios dos personaxes".

La propuesta garró a Alfonso en cama, con una gripe ensin importancia. L'actor -físicamente delgáu como Pinón y Alfonso- saludó a voces a Tina, llegó hasta'l cuartu d'Alfonso y gritó-y: ¡Arriba, vagu, qué faes na cama! Actu siguíu, propuso-y qu'escribiere una obra de teatru colos dos célebres aldeanos, dientro de la tradición del teatru popular asturianu. La propuesta afalagó a Alfonso, que lo recuerda asina nes sos memories:

"Pa min, constituyó una satisfaición inmensa el qu'aquel fenomenal actor me considerare capaz de poder escribir una comedia. Al principiu intenté escapame del compromisu onde me metía: ¿qué sabía yo del teatru? Pero, en fin, pudo más la ilusión que constituyía pa min ver a los míos personaxes encarnaos en carne y güesu nuna función teatral que'l mi miéu a pagar la novatada con un fracasu como autor. Y a los dos meses o dalgo más, entregué-y la mio primicia teatral que llevaba por títulu Pinón y Telva, curtiamente. Estrenóse n'Avilés. Naturalmente, yera la obra d'un principiantey nun podíen pidi-y peres al olmu. Pero, en fin, la obrina defendióse y tuvo claru ésitu de públicu". 

Alfonso, nes sos memories, nun paez que quedare mui contentu del so trabayu de llibretu, pero sí quedó conpensáu pol ésitu de públicu que tuvo la obra, representada n'Avilés y más tarde n'Uviéu y Xixón: "Ya dábame cuenta perfeutamente de que la cosa diba mui bien". Pero José Manuel Rodríguez enfermó y morrió rápidamente. El so entierru en Xixón fue multitudinariu, La compañía desfízose.