CARTEL

El cartel del montaxe ye un homenaxe a la relaición que caltuvieron Alfonso Iglesias y los sos personaxes y a la Compañía Asturiana. 

Cuando s'estrena la obra, nos primeros años de la década de los 40, Telva y Pinón van ser encarnaos polos dos cómicos de referencia del momentu: Aurora Sánchez y José Manuel Rodríguez. Ellos dos van ser quien pa da-yos vida y, tamién, apariencia. Nun dexa de ser curiosa la evolución de los rasgos nes viñetes. Mientres qu'enantes son mui esquemáticos, dempués del estrenu, Telva y Pinón garren los rasgos d'Aurora y José Manuel.

Nesta ocasión, permítimonos camudar les cares de Telva y Pinón  poles simpátiques caricatures de los compañeros que van interpretar esos carácteres: Belén Sánchez y Manuel F. Rodríguez. Hemos dar les gracies a la historiadora y periodista Arantza Margolles Beran por esta acuarela tan prestosa.

Y, de fondu, un amiestu de los paisaxes asturianos qu'Alfonso gustaba usar p'ambientar los chistes de la pareya humorística, con ilesia y casería de fondu: una escenografía perfeuta pa cualisquier obra costumista asturiana.